Sot, në shkollën tonë u shënua Dita Botërore e Shëndetit Mendor, si një mundësi për të rritur ndërgjegjësimin për çështje të shëndetit mendor.
Nxënësit tanë në bashkëpunim me psikologun e shkollës Arta Hasani Maksuti dhe prof. Jelena Ranđelović kanë përgaditur një prezantim me temën ,,Dhuna elektronike”, duke vënë theksin tek adoleshenca dhe dhuna elektronike, mbështetja dhe ndihma ndaj nxënësve të cilët janë viktima të dhunës elektronike dhe po kalojnë në periudha të vështira të shëndetit mendor.
Ky prezantim është pjesë e projektit ,,Qyteti ynë, shkollat tona” i cili u mbështet nga Trupi Koordinues i Qeverisë së Republikës së Serbisë për komunat Preshevë, Bujanoc dhe Medvegja në bashkëpunim me Grupin 484 me mbështetjen e Fondacionit Pestalozzi nga Zvicra (Pestalozzi Children Fondation).
Parlamenti i nxënësve organizoi një aktivitet të veçantë me rastin e Ditës së Shëndetit Mendor, duke krijuar një kënd “pikturimi dhe relaksimi” për të gjithë nxënësit. Kjo hapësirë ofroi një mundësi për t’u shprehur në mënyrë kreative dhe për të ndihmuar në uljen e stresit, duke promovuar mirëqenien mendore dhe fizike në një atmosferë të qetë dhe mbështetëse.
